„Það sem ég held að hafi slitið þessu samstarfi var staða flokkanna í skoðanakönnunum og að það eru að koma sveitastjórnarkosningar þar sem Björt framtíð ætlar að halda velli og Viðreisn ætlar að koma inn. Björt framtíð sérstaklega leit svo á að það yrði að gera eitthvað drastískt. Þetta var mjög pólitísk spekúlasjón,“ segir Friðjón R. Friðjónsson almannatengill um stjórnarslitin á dögunum.
Friðjón lét þessi orð falla í þættinum Silfrið á RÚV en hann hafnar því að trúnaðarbrestur hafi verið raunveruleg ástæða stjórnarslitanna: „Þetta var sjálfsbjargarviðleitni. Það var enginn trúnaðarbrestur til að byrja með. Óttar vissi þetta á mánudaginn og sagði ekki neitt fyrr en á fimmtudaginn. Sama gildir um Benedikt sem sagði að enginn trúnaðarbrestur hefði átt sér stað. Síðan eftir að frekar ósmekklegar yfirlýsingar frá Þorgerði Katrínu og Þorsteini Víglundssyn birtast á Facebook þá skiptir Benedikt allt í einu um skoðun og segir að trúnaðarbrestur hafi orðið,“ segir Friðjón um meintan trúnaðarbrest þess efnis að Sigríður Andersen dómsmálaráðherra hafi sagt Bjarna Benediktssyni einum manna að nafn föður hans, Benedikts Sveinssonar, hafi verið á lista meðmælenda undir umsóknarbréfi Hjalta Haukssonar barnaníðings um uppreist æru.
Friðjón segir að ekki sé ástæða til að draga of miklar ályktanir af niðurstöðum skoðanakannanna þar sem VG mælist stærst og Sjálfstæðisflokkurinn tapar nokkru fylgi. Enn sé of langt til kosninga. Hins vegar megi búast við mikilli kosningarþreytu hjá almenningi þar sem þetta séu þriðju stóru kosningarnar á 16 mánuðum, í fyrra hafi bæði verið forsetakosningar og alþingiskosningar.