Guðrún Guðmunda Sæmundsdóttir, 85 ára gömul ekkja í Vesturbænum, hefur endurheimt demantshring sem hún segir að ræstingakona frá Heimaþjónustu Reykjavíkur hafi stolið af sér í sumar.
Um síðustu helgi birti dv.is viðtal við Guðrúnu þar sem hún sagðist telja að ræstingafólk frá borginni bæri ábyrgð á hvarfi hringsins.
Einnig var haft samband við Heimaþjónustu Reykjavíkur sem gerði skilmerkilega grein fyrir verklagi í svona málum.
Heimildir DV herma að rannsókn hafi verið framkvæmd innan Heimaþjónustunnar í kjölfar fréttarinnar. Fyrir skömmu fékk Guðrún síðan hinn forláta demantshring sinn aftur í hendur. Hins vegar liggur ekki fyrir með neinum áþreifanlega sannanlegum hætti hvernig hringurinn rataði aftur í hendur Guðrúnar en málið hefur fengið farsæla lausn.