Sonurinn sakaður um að tengjast kínverskum glæpasamtökum
Rodrigo Duterte, hinn litríki og mjög svo umdeildi forseti Filippseyja, hefur hótað því að láta drepa son sinn komi á daginn að ásakanir um að hann tengist erlendum eiturlyfjahring séu á rökum reistar.
Duterte hefur skorið upp herör gegn fíkniefnum síðan hann tók við embætti forseta og hafa þúsundir eiturlyfjaneytenda og eiturlyfjasala verið drepnir undanfarin misseri.
Paolo Duterte, 42 ára sonur forsetans, kom fyrir þingnefnd fyrr í þessum mánuði þar sem hann þvertók fyrir orðróm þess efnis að hann tengdist kínverskum glæpasamtökum. Samtökin sem um ræðir eru talin hafa smyglað miklu magni af metamfemtamíni til Filippseyja.
Að sögn breska blaðsins Guardian hefur Duterte nú ítrekað ummæli sem hann lét falla í kosningabaráttunni á síðasta ári. Þá sagði hann að ef börn hans myndu flækjast í mál tengdum fíkniefnum þá yrðu þau drepin. Hann írekaði þessi ummæli í ræðu sem hann hélt í gærkvöldi fyrir utan forsetahöllina í Manila.
„Ég hef sagt við Paolo: Skipun mín er að drepa þig ef þú næst. Og ég mun vernda þann lögreglumann sem drepur þig, ef ásakanirnar reynast réttar.“
Talið er að minnst 3.800 manns hafi fallið í stríði lögreglunnar gegn fíkniefnum síðan Duterte tók við völdum fyrir rúmu ári.