Rúmlega 62 prósent þeirra sem tóku afstöðu í nýjum þjóðarpúlsi Gallup voru hlynnt þeirri ákvörðun Bjartrar framtíðar að slíta ríkisstjórnarsamstarfi. 29 prósent voru andvíg henni og nær 9 prósent sögðust hvorki hlynnt né andvíg ákvörðuninni.
Landsmenn voru einnig spurðir um álit sitt á því hvort nýliðnir atburðir hefðu gefið tilefni til stjórnarslita. Niðurstöðurnar eru svipaðar og við spurningunni á undan. Rúmlega 62 prósent þeirra sem taka afstöðu eru sammála því að atburðirnir hafi gefið tilefni til stjórnarslita á meðan tæplega 32 prósent eru ósammála því. Tæplega 6 prósent segjast hvorki sammála né ósammála.
Í framhaldinu var fólk spurt um viðhorf sitt til þess að rjúfa þing og boða til kosninga. Ríflega sjö af hverjum tíu voru hlynntir því að þing væri rofið og boðað til kosninga á meðan tveir af hverjum tíu voru því andvígir. Rúmlega 8 prósent voru hvorki hlynnt né andvíg.
Loks var athugað hvaða flokkar fólk vildi að mynduðu stjórn ef ný ríkisstjórn væri mynduð í dag. Flestir nefna Vinstri græn, eða tæplega 57 prósent. Þar á eftir koma Framsóknarflokkurinn með nær 35 prósent, Samfylkingin með næstum 33 prósent, Sjálfstæðisflokkurinn með rúmlega 31 prósent og Píratar með rúm 30 prósent.
