Kafbátur, sem virðist hafa sokkið á tímum fyrri heimsstyrjaldarinnar, fannst undan ströndum Belgíu á dögunum. Fundurinn er einstakur en um borð eru líkamsleifar tuttugu og þriggja einstaklinga.
Þetta segir Carl Decaluwe, ríkisstjóri í Vestur-Flæmingjalandi, í samtali við fréttastofu AP.
„Það er ótrúlegt að við skyldum finna eitthvað þessu líkt. Það eru skemmdir á fremsta hluta kafbátsins en hann er lokaður og það eru enn tuttugu og þrír um borð,“ segir hann.
Kafbáturinn sem um ræðir er af gerðinni UB-II en þeir voru smíðaðir í Þýskalandi og einkum notaðir af þýska hernum. Um 30 slíkir kafbátar voru smíðaðir og gátu þeir kafað á allt að 50 metra dýpi.
Kafbáturinn sem fannst er 27 metra langur og liggur á um 25 til 30 metra dýpi. Nákvæm staðsetning hans hefur ekki verið gefin upp til að tryggja að óboðnir einstaklingar geti ekki vitjað hans. Carl segir að sendiherra Þýskalands hafi verið gert kunnugt um fundinn en næstu skref hafa ekki verið ákveðin.