Sextán eru látnir og hátt í þrjú hundruð manns hafa verið lagðir inn á sjúkrahús vegna lifrarbólgu A-faraldurs sem nú skekur Kaliforníu í Bandaríkjunum.

Á undanförnum vikum hafa rúmlega fjögur hundruð manns smitast af sjúkdómnum sem orsakast af veiru. Einkenni sjúkdómsins eru meðal annars hár hiti, gula, lystarleysi, ógleði og þreyta en sjúkdómurinn gengur sjálfkrafa yfir og án meðferðar.

Yfirvöld í Kaliforníu hafa þegar gripið til umfangsmikilla aðgerða til að hefta útbreiðslu sjúkdómsins. Í San Diego-sýslu, þar sem ástandið er hvað verst, hafa nítján þúsund manns verið bólusettir á undanförnum vikum og þá hafa starfsmenn borgarinnar úðað klórblönduðu vatni á gangstéttar og húsveggi í borginni.

Heimilislausir íbúar San Diego hafa orðið hvað verst fyrir barðinu á sjúkdómnum og hafa borgaryfirvöld komið fyrir 40 handþvottastöðvum í borginni þar sem heimilislausir halda til. Þá mun borgin opna þrjú gistiskýli fyrir heimilislausa með það að markmiði að hefta útbreiðsluna enn frekar.