Vilhjálmur gerir lítið úr „afreki“ forsætisráðherra: „Getur klárlega sagt að launahækkun kjararáðs sé "stórkostlegt afrek"“

Bjarni Benediktsson forsætisráðherra sló sér á brjóst á hádegisfundi eldri Sjálfstæðismanna í Valhöll í dag. Sagði Bjarni að það væri stórkostlegt afrek að geta hækkað greiðslur til ellilífeyrisþega í 300 þúsund krónur á mánuði. Frá þessu greinir Morgunblaðið. Bjarni sagði:

„Ég er stolt­ur af breyt­ing­unni sem felst í því að þetta sama fólk hafði ein­ung­is 225 þúsund fyr­ir tveim­ur árum. Þetta eru ein­hverj­ar mestu fram­far­ir sem hafa orðið á þessu sviði en við erum ekki búin. Við ætl­um að halda áfram á þess­ari braut.“

Vilhjálmur Birgisson verkalýðsforingi á Akranesi gefur lítið fyrir þetta og tjáir sig um fundinn á Facebook-síðu sinni og spyr hvað Bjarni myndi segja um það „afrek“ að hækka laun þingmanna um 448 þúsund eða 68% á mánuði. Vilhjálmur segir:

„Forsætisráðherra segir það vera „stórkostlegt afrek“ að um næstu ára­mót muni greiðslur til elli­líf­eyr­isþega frá Trygg­inga­stofn­un ná 300 þúsund krón­um á mánuði. En hann bendir á að árið 2015 hafi þessi sama greiðsla verið 225 þúsund krón­ur eða sem nemur 25% hækkun á föstu verðlagi. Þetta er sem sagt hækkun upp á 75 þúsund á mánuði á þremur árum.“

Vilhjálmur heldur áfram:

„En hvað skyldi þá forsætisráðherra segja yfir „afreki“ kjararáðs sem hefur hækkað þingfarakaupið frá sama tíma úr 651 þúsund á mánuði í 1,1 milljón eða sem nemur 448 þúsundum á mánuði eða sem nemur 68%.“

Vilhjálmur telur að í þessu samhengi sé hækkun til ellilífeyrisþega ekkert til að hreykja sér af líkt og Bjarni gerði í dag. Staðreyndirnar tali sínu máli.

„Ég held í ljósi þessara staðreynda að hann geti varla kallað hækkun á ellilífeyrir upp á 300 þúsund á mánuði ekkert „stórkostlegt afrek“ Hann getur hins vegar klárlega sagt að launahækkun kjararáðs sé "stórkostlegt afrek"“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.