Í lok júní var faðir að skipta um bleiu á eins árs dóttur sinni eins og oftar. Þá uppgötvaði hann rauðan blett undir bleiunni. Bletturinn var á vinstra lærinu. Hann ákvað strax að fara með stúlkuna til læknis en það var ákvörðun sem reyndist hafa mjög slæm áhrif á föðurinn.
Faðirinn, Kevin Gardiner, er rúmlega þrítugur og býr í Haverhill í Suffolk á Englandi. Mirror segir að hann og unnusta hans, Jasmine Yates, hafi ákveðið að fara með dótturina, Amara til læknis til að láta skoða þennan rauða blett.
Læknirinn, sem skoðaði Amara, taldi að um brunasár væri að ræða og hafði samband við lögregluna og félagsmálayfirvöld.
„Við reyndum bara að gera það sem rétt var en það endaði með að ég var sakaður um misþyrmingar.“
Sagði Kevin í samtali við The Sun.
Hann var tekinn í yfirheyrslu og ekki leyft að koma nærri fjölskyldu sinn í rúmlega viku. Félagsmálayfirvöld gerðu einnig úttekt á aðstæðunum á heimili fjölskyldunnar.
Jasmine sagði að um leið og þau komu á sjúkrahúsið með Jasmine hafi starfsfólkið gefið þeim illt auga og horft á þau eins og þau hefðu beitt Amara ofbeldi. Fylgst hafi verið með hverri hreyfingu þeirra og ekkert gert til að hughreista þau og segja þeim að ekkert alvarlegt amaði að Amara.
Síðar kom í ljós að rauði bletturinn var húðsýking, um leið og það lá ljóst fyrir fékk Kevin að hitta fjölskyldu sína á nýjan leik.
Sjúkrahúsið hefur beðist afsökunar á málinu og hvatt fjölskylduna til að kvarta yfir málinu til þar til bærrar stofnunar. Félagsmálayfirvöld hafa þó ekki enn sleppt hendinni af fjölskyldunni og koma starfsmenn þeirra í heimsókn öðru hvoru en hafa ekki gefið neinar skýringar á af hverju eftirlitinu er haldið áfram.