Lögreglan á Suðurnesjum hefur staðfest að erlendur karlmaður liggi alvarlega slasaður á gjörgæsludeild eftir að hafa hent sér út úr leigubíl á ferð við Ásbrú. Greint er frá málinu í helgarblaði DV. Fram kom í frétt DV að atvikið hefði átt sér stað síðastliðinn mánudag.
Maðurinn steig upp í leigubílinn við Flugstöð Leifs Eiríkssonar og pantaði sér far að Ásbrúar-svæðinu. Þegar á áfangastað var komið virkaði ekki kort mannsins og því gat hann ekki greitt fyrir bílinn. Hann og leigubílstjórinn urðu sammála um að snúa við og athuga hvort kortið myndi virka í öðrum posa.
Þegar stutt var liðið af ferðinni til baka þá opnaði farþeginn fyrirvaralaust dyrnar og henti sér út. Samkvæmt heimildum DV var bílinn þá á um 40 kílómetra hraða á klukkustund. Farþeginn stórslasaðist við fallið og hringdi bílstjóri aðvífandi leigubíls samstundis á sjúkrabíl. Leigubílstjórinn vildi ekki tjá sig um atvikið en var auðheyrilega miður sín vegna þess.
„Mánudaginn 28. ágúst 2017, kl. 23:15, barst Neyðarlínunni tilkynning um að að maður hefði fallið út úr bifreið á ferð á Austurbraut á Ásbrú í Reykjanesbæ. Lögreglan á Suðurnesjum sinnti málinu ásamt sjúkraliði.
Þarna hafði kínverskur ríkisborgari, tæplega fertugur karlmaður, farið úr leigubifreið á ferð með þeim afleiðingum að hann hlaut mikla höfuðáverka. Hann var fluttur á Landspítala í Fossvogi þar sem hann gekkst undir aðgerð.
Maðurinn var farþegi í leigubifreiðinni þegar slysið varð en bifreiðinni mun hafa verið ekið með um 40 km hraða á klst. Nánari tildrög slyssins eru til rannsóknar hjá lögreglunni á Suðurnesjum.“
Þá kemur fram að samband hafi náðst við foreldra mannsins í Kína en hann liggur þungt haldinn og meðvitundarlaus á Landspítalanum.