Á þriðja tímanum í nótt var lögreglunni á höfuðborgarsvæðinu tilkynnt um húsbrot og alvarlega líkamsárás þar sem hafnarboltakylfa hafði að sögn verið notuð til að lemja mann. Sá hlaut nokkra áverka en þó ekki alvarlega. Meintir gerendur voru farnir af vettvangi þegar lögreglan kom þangað.
Klukkustund síðar voru tveir karlmenn og kona handtekinn vegna rannsóknar málsins. Þau voru vistuð í fangageymslu og verða yfirheyrð í dag.
Um miðnætti var karlmaður um þrítugt handtekinn í Breiðholti vegna heimilisofbeldismáls. Hann var vistaður í fangageymslu.
Um miðnætti var tvítugur karlmaður handtekinn í miðborginni vegna ölvunar og óspekta. Hann hafði brotið rúðu á skemmtistað og var með hníf á sér sem og meint fíkniefni. Hann var vistaður í fangageymslu.
Fjórir ökumenn voru handteknir á höfuðborgarsvæðinu í nótt en þeir eru allir grunaðir um ölvun við akstur eða akstur undir áhrifum fíkniefna.