„Sjöunda brautin er ógurlega falleg og þar er gott skjól af trjánum. Þetta er líka sléttasta svæði sem er hægt að finna í margra kílómetra radíus,“ segir Jón Freyr Jóhannsson golfáhugamaður sem þurfti nýlega að reka tvo erlenda ferðamenn af golfvellinum Glanna í Borgarnesi þar sem þeir höfðu slegið upp tjaldbúðum á sjöundu brautinni.

Atvikið átti sér stað kvöld eitt um miðjan júlí þegar Jón Freyr, sem er stjórnarmaður í golfklúbbnum, var að fara golfhring eftir kvöldmat.

„Þegar ég mætti sá ég menn vera að baksa eitthvað hinum megin á golfvellinum en velti því ekkert meira fyrir mér – ekki fyrr en þegar kom á teiginn á sjöundu brautinni. Þá sá ég tvö tjöld á miðri brautinni fram undan,“ segir Jón og veltir fyrir sér hvaða reglur gildi ef kúlan lendi á tjaldi á brautinni. „Ég er ekki viss um að það sé tekið sérstaklega fram í reglunum, en spurningin er hvort tjaldið teljist hreyfanleg eða óhreyfanleg hindrun,“ segir hann og hlær.

„Ég sleppti því að slá og hinkraði hjá tjöldunum þar til tveir menn komu til baka. Á bjagaðri ensku viðurkenndu þeir að eiga tjöldin og þeim fyndist staðsetningin góð – það væri hvort sem er enginn þarna. Ég benti á að ég væri nú þarna og kannski kæmu fleiri að spila,“ segir Jón.

„Þeir sýndu ekki á sér neitt fararsnið þannig að ég sagðist ætla að spila nokkrar holur í viðbót en að þeim loknum skyldu þeir vera farnir. Þeir stóðu eftir og virtust vera að athuga hvort ég færi ekki bara heim. En þegar ég kom aftur hunskuðust þeir loksins til að taka tjöldin niður.“