Skemmtiferðasigling breyttist í martröð
Farþegar um borð í skemmtiferðaskipinu The Carnival Spirit fengu heldur meira en þeir báðu um á dögunum þegar slæmt veður gerði skammt undan ströndum Ástralíu.
Ölduhæð náði tólf til fimmtán metrum og vindhraði var rúmir 30 metrar á sekúndu sem er dágott. Rúmlega 2.100 farþegar voru um borð í skipinu þegar óveðrið gerði og urðu nokkrar skemmdir á innanstokksmunum. Glös og diskar féllu úr skápum og hillum og á myndum sem farþegar birtu á samskiptamiðlum má sjá mat á víð og dreif um skipið.
Judith Spence, farþegi um borð, segir að hún hafi upplifað eina verstu nótt ævi sinnar þegar óveðrið gerði. „Ölduhæð var tólf metrar, stundum fimmtán og vindhraði var 30 metrar á sekúndu. Mjög margir veikir í dag. Hélt að skipið myndi leggjast á hliðina,“ hefur vefútgáfa breska blaðsins Mirror eftir henni. „Þetta var óhugnanlegasta kvöld ævi minnar,“ bætir hún hún.
Þrátt fyrir slæmt veður og eflaust örari hjartslátt hjá mörgum farþegum var ekki tilkynnt um nein slys á fólki. Skipið kom til hafnar í Sydney í Ástralíu á mánudag.