Björn Bjarnason, fyrrverandi þingmaður og ráðherra Sjálfstæðisflokksins til margra ára, birti á Facebook-síðu sinni í gær mynd frá Fossvogskirkjugarði þar sem má sjá veggjakrot á skilti við Sóllands duftreitinn. Um þetta segir Björn: „Vandalisminn veður uppi í borginni. Ekki einu sinni skilti Fossvogskirkjugarðs fær frið.“
Fjölmargir skrifa athugasemd við þessa færslu Björns og eru nær allir á einu máli að svona hegðun sé til skammar og ömurleg framkoma. Guðjón einn Jónsson spyr þó sérstaklega um hvað GTFO þýði. „Hvað á þetta svo að standa fyrir? Eitthvað á íslensku, þýsku eða ensku?,“ spyr Guðjón.
Björn spyr á móti hvort þetta séu ekki einfaldlega einkennisstafir þess sem krotaði á skiltið. „Ætli þetta séu ekki einkennisstafir vandalans? Þeir gera í því að ögra aðgerðalausum yfirvöldum,“ segir Björn.
Jóhann D Egilsson bendir honum á að líklegast sé þetta skammstöfun sem er algeng á internetinu. „GTFO stendur fyrir Get The Fuck Out. En sami skaði er skeður hvað svo sem er krotað á skiltið,“ skrifar Jóhann.
Björn svarar um hæl: „Hann velur sér fögur einkunnarorð þessi krotari!“ Marinó Muggur Þorbjarnarson veltir þessum orðum fyrir sér og spyr í athugasemd: „Hvort vísar krotarinn orðunum að hvílandi fólki garðsins eða tímabundnum íbúum landsins, ferðamönnunum? Eða er hann hann ef til vill að tala við sjálfan sig?“