Aðalmeðferð í máli Thomas Møller Olsen, sem er sakaður um að hafa myrt Birnu Brjánsdóttur, hélt áfram í dag. Nú í morgun hafa bæði lögreglumenn og sérfræðingar borið vitni. Athygli vekur að Thomas er sjálfur ekki viðstaddur aðalmeðferð.
Bergsteinn Karlsson, fyrrverandi rannsóknarlögreglumaður, bar vitni nú í morgun og var spurður sérstaklega um skýrslu um samfélagsmiðlanotkun Birnu og Thomasar. „Það var leitað eftir upplýsingum sem gátu gefið eitthvað til kynna varðandi staðsetningu hennar. Við fórum í gegnum chattið, notifications á Facebook. Ekkert sem vakti grunsemdir. Engin virkni á samfélagsmiðlum um nóttina,“ sagði Bergsteinn um notkun Birnu.
Bergsteinn sagði meðal annars að Thomas hafi sent pabba sínum SMS um nóttina. „Thomas var fyrst og fremst að skoða myndir og samskipti í gegnum símann. Sendi pabba sínum og kærustu SMS. Við fengum símagögn frá Grænlandi. Bárum þetta saman,“ sagði Bergsteinn. Ekki kom fram hvað Thomas hafi skrifað í skeytunum.
Verjandi Thomasar spurði sérstaklega um hvort samskipti hafi verið á milli Birnu og Thomasar um nóttina. „Það voru engin samskipti í símagögnunum á milli þeirra,“ svaraði Bergsteinn.