Dómstóll í Los Angeles hefur úrskurðað að bandaríska fyrirtækið Johnson & Johnson þurfi að greiða konu, Eva Echevarria að nafni, 417 milljónir Bandaríkjadala, 44,2 milljarða króna í bætur, vegna krabbameins sem hún greindist með.

Eva stefndi fyrirtækinu eftir að hafa greinst með krabbamein í eggjastokkum, en í stefnunni kom fram að talkúm í barnapúðri frá fyrirtækinu hefði valdið meininu. Eva hafði notað púðrið daglega frá því á sjötta áratug liðinnar aldar og allt til ársins 2016. Í stefnunni kom fram að fyrirtækið hefði ekki varað viðskiptavini sína við því að efnið gæti verið krabbameinsvaldandi.

Fjölmargir hafa stefnt fyrirtækinu vegna sambærilegra atvika, en bæturnar sem dómstóllinn í Los Angeles úrskurðaði eru þær hæstu sem dæmdar hafa verið. Eva greindist með krabbamein árið 2007 og dvelur nú á sjúkrahúsi þar sem hún er í meðferð.

„Eva er að dauðvona vegna krabbameinsins og hefur sagt að það eina sem hún vilji gera sé að hjálpa öðrum konum sem eru með krabbamein eftir að hafa notað vörur Johnson & Johnson,“ segir lögmaður Evu, Mark Robinson.

Talsmaður Johnson & Johnson, Carol Goodrich, segir að fyrirtækið muni áfrýja dómnum.