Aðalmeðferð í morðmáli Birnu Brjánsdóttur fer nú fram í héraðsdómi Reykjaness. Sakborningurinn Thomas Möller Olsen lýsir nú sinni hlið á atburðunum.
Thomas útskýrir ferðir sínar laugardagsmorgunin 14. janúar með því að hann hafi þurft að afhenda ákveðinni manneskju pakka. Hann vill þó ekki segja hver manneskjan er eða hvað hafi verið í pakkanum. „Ég get ekki sagt meira um þetta. Ég verð að passa mig“.
Kolbrún Benediktsdóttir, saksóknari í málinu þjarmaði að honum varðandi þennan pakka. Um það hvað hafi verið í honum og hversu stór hann hafi verið en Thomas svaraði: „Ég get ekki sagt. Ég vil ekki segja meira um þetta“. Þá greip verjandi hans inn í og sagði að Thomas myndi ekki tjá sig meira um pakkann.
Thomas Möller Olsen er einnig ákærður fyrir stórfelldan fíkniefnainnflutning.