Elon Musk og fleiri sérfræðingar skrifa Sameinuðu þjóðunum bréf
Elon Musk, stofnandi Tesla, ásamt hópi sérfræðinga á sviði gervigreindar og vélmenna, kallar eftir því að Sameinuðu þjóðirnar beiti sér gegn því að ríki heimsins geti unnið að þróun svonefndra drápsvélmenna. Musk er í hópi 116 sérfræðinga frá 26 löndum sem kallar eftir þessu.
Fjallað er um þetta á vef breska blaðsins Guardian. Í umfjölluninni er bent á að Sameinuðu þjóðirnar hafi nýlega byrjað að ræða um slík vopn, til dæmis dróna, skriðdreka og skotvopn. Vísað er í bréf sérfræðinganna þar sem fram kemur að mikilvægt sé að stöðva það vígbúnaðarkapphlaup, sem fyrirsjáanlegt er að verði á sviði gervigreindar, strax í fæðingu.
Í bréfinu kemur fram að líkja megi vopnuðum vélmennum við tvennskonar kapphlaup eða byltingar sem hafa átt sér stað á undanförnum áratugum og öldum á sviði vígbúnaðar; byssupúðrinu og kjarnorkuvopnum. Þegar farið verði að þróa vopnuð vélmenni sé hætta á að vopnuð átök muni eiga sér stað í mun stærri mæli og á mun skemmri tíma en hingað til hefur þekkst. Verið sé að bjóða hættunni heim því vopn af þessu tagi geti komist í hendur hryðjuverkamanna eða einstaklinga sem geta hakkað sig inn í þau.
„Við höfum ekki langan tíma til að bregðast við. Um leið og búið verður að opna þetta Pandórubox verður erfitt að loka því,“ segir í bréfinu.
Sérfræðingar hafa áður varað við því að þróun gervigreindar sé komin það langt á veg að það sé frekar spurning um ár en áratugi þar til búið verður að þróa það sem kallað er sjálfstæð vopn, eða vopnuð vélmenni. Á sama tíma og gervigreind geti gert vígvöllinn sem slíkan öruggari sé hætta á að minna þurfi til að átök brjótist út – sem aftur muni leiða til fleiri dauðsfalla.