Andrew Wilkinson er ósáttur við British Airways
Andrew Wilkinson, 39 ára Breti, segir farir sínar ekki sléttar af samskiptum hans við flugfélagið British Airways. Wilkinson þessi var nefnilega látinn sitja í hlandblautu sæti í ellefu klukkustundir á ferðalagi sínu frá Heathrow til Höfðaborgar í Suður-Afríku.
Vefútgáfa breska blaðsins Mirror fjallar um þessa reynslu Andrews. Hann segist hafa bent starfsfólki vélarinnar á að sætið væri blautt þegar hann fór um borð, en í fyrstu taldi hann að um vatn væri að ræða. Síðar hafi hann þó áttað sig á því að um eitthvað allt annað og verra en vatn væri að ræða.
„Lyktin var þannig að þetta gat ekki verið annað en þvag. Ég sagði flugfreyjunni frá þessu,“ segir Wilkinson sem bætir við að hún hafi verið sammála honum eftir að hafa fundið lyktina af sætinu. „Hún fór á salernið og náði í nokkrar þurrkur og sagði mér að þerra sætið.“
Andrew kveðst vera ósáttur við viðbrögð starfsfólks í vélinni. Hann beindi því til umræddrar flugfreyju að fá að setjast á viðskiptafarrými þar sem setið var í öllum öðrum sætum í vélinni en, þrátt fyrir umleitanir, hafi hann setið í sama sætinu alla ferðina. Hann hafi fengið eitt teppi til að sitja á en annað ekki.
Andrew segist hafa kvartað þegar heim var komið og segir hann í samtali við Mirror að forsvarsmenn flugfélagsins hafi boðið honum smánarlegar bætur, að hans mati. „Ég fékk 5.000 Avios-punkta en mér finnst það ekki mikið við það að ég þurfti að sitja í hlandblautu sæti í ellefu klukkustundir,“ segir hann en fimm þúsund punktar duga fyrir fari aðra leið til Parísar.
Upplýsingafulltrúi British Airways segir að forsvarsmenn félagsins séu miður sín vegna málsins og nú þegar hafi verið haft samband við Andrew. Félagið leggi mikið upp úr því að hreinlætis sé gætt um borð í vélunum.