„Ef ekki kæmu til tilfallandi kjólasýningar í þingsölum, fregnir af óviðeigandi kynhegðun á útihátíðum og margbreytilegur og sívaxandi ferðamannastraumur væri hægt að loka í Efstaleiti og á fréttastofum dagblaðanna,“ segir Hjörleifur Guttormsson, fyrrverandi ráðherra og þingmaður Alþýðubandalagsins á Austurlandi, í aðsendri grein í Morgunblaðinu en þar svarar hann fyrir hlut sinn að því að málað hafi verið yfir sjómanninn á Sjávarútvegshúsinu. Líkt og hefur komið fram barðist Hjörleifur fyrir því að málað yrði yfir listaverkið.
Hjörleifur telur að málið hafi verið blásið út vegna gúrkutíðar, sumartíðar þegar lítið er um nýjar fréttir. „En þegar neyðin er stærst þá er hjálpin næst. Vökul augu vegfarenda á leið vestur Skúlagötu og Sæbraut fóru að taka eftir því að eitthvað hefði breyst: Búið var að mála yfir stóra mynd á austurgafli Sjávarútvegshússins sem þar hafði blasað við frá haustinu 2015 og þetta gerðist án þess að fréttamiðlum hefði verið gert viðvart fyrirfram. Sjálft Fréttablaðið rumskaði loks þrem vikum eftir gjörninginn, en þá varð líka uppi fótur og fit og dregnar fram stórar fyrirsagnir: „Sjómannsins saknað en enginn vill axla ábyrgð á hvarfi hans.“ Sjálfur sjávarútvegsráðherrann kom af fjöllum á eigin vinnustað og taldi líklegt að þar væri verið að brjóta höfundarrétt,“ skrifar Hjörleifur.
Hjörleifur segir að málið sýni mikla bresti hjá stjórnendum Reykjavíkurborgar. „Hver er staða stjórnenda Reykjavíkur gagnvart þeim sem ástunda veggjakrot á eignir borgarbúa og staðhæfa margir hverjir að þar sé um listaverk að ræða? Reykjavík er að verða útbíuð af þess háttar skrauti, Umhverfi Reykjavíkur verðskuldar önnur vinnubrögð en þau sem endurspeglast í þessu máli. – Höfuðstaðurinn þarf á jákvæðri samvinnu við íbúana að halda og trúnaði í samskiptum. Sem betur fer er hér ekki allt á verri veginn. Ég hef nokkrum sinnum leyft mér að hafa samband við garð- yrkjudeild borgarinnar með ábendingar, sem brugðist hefur verið við jákvætt og eðlilega,“ segir Hjörleifur.
Hann gagnrýnir svo að RÚV hafi gert frétt upp um tölvupóst samskipti sín við borgarstarfsmenn. „Hlutur fréttastofu Ríkisútvarpsins er í þessu samhengi afar sérstakur. Þar á bæ veita menn móttöku tölvupóstum úr borgarkerfinu frá fólki sem er greinilega mikið í mun að beina athygli frá eigin sam- þykktum og gjörðum og benda þess í stað á sökudólg úti í bæ. Settur er saman hrærigrautur úr þessum feng og birtur á fréttavef RÚV. Mann tekur sárt að sjá „útvarp allra landsmanna“ láta misnota sig með þessum hætti. Alvarlegri eru þó þeir brestir sem endurspeglast nú um stundir í stjórnkerfi Reykjavíkur á mörgum sviðum og veggjakrot í kjölfar handauppréttinga í borgarstjórninni er aðeins örlítið dæmi um,“ segir Hjörleifur.