Maðurinn sem stakk tvær konur til bana í borginni Turku á föstudag heitir Abderrahman Mechkah og er átján ára. Hann var búsettur í miðstöð fyrir flóttamenn í borginni og hafði sótt um hæli í Finnlandi eftir að hafa komið frá Marokkó.

Frá þessu greinir finnska ríkisútvarpið, YLE. Hann mun svara til saka fyrir finnskum dómstólum á morgun en hann dvelur nú á sjúkrahúsi eftir að hafa verið skotinn af lögreglu. Mechkah lagði til fólksins með hnífi en auk þess að bana tveimur konum særði hann átta til viðbótar.

Fjórir aðrir Marokkóar eru grunaðir um aðild að árásinni en þeir neita sök, að sögn lögreglu. Þá hefur alþjóðleg handtökuskipun verið gefin út á hendur fimmta manninum sem grunaður er um aðild að málinu. Lögregla telur að um skipulagða hryðjuverkaárás hafi verið að ræða.

Í gær voru fjögur fórnarlömb mannsins enn á sjúkrahúsi, þar af þrjú á gjörgæsludeild. Ástand þeirra er sagt stöðugt.