Margir fóru yfir strikið á Menningarnótt
Menningarnótt er almennt talin hafa farið vel fram en margir skemmtu sér þó nokkuð taumlaust og voru miklar annir hjá lögreglu í nótt. Nokkrir öfurölvi einstaklingar voru fluttir á slysadeild eftir að hafa misst fótanna í gleðinni og vímunni. Töluvert var um ölvunarakstur og akstur undir áhrifum fíkniefna.
Lögreglan í Reykjavík hefur sent frá sér eftirfarandi samantekt um Menningarnótt:
Að venju var töluvert annríki hjá lögreglu á Menningarnótt enda lögðu tugþúsundir gesta leið sína í miðborgina. Hátíðin gekk að flestu leyti vel, en einhverjir fóru þó yfir strikið í gleðinni og eyddu því nóttinni í fangageymslu. Raunar voru fangaklefar á lögreglustöðinni við Hverfisgötu fullnýttir og svo fór að vista þurfti líka fólk í miður góðu ástandi í fangaklefum á lögreglustöðinni í Hafnarfirði. Margir voru í ansi slæmu ásigkomulagi og voru enn að sofa úr sér vímuna þegar komið var vel fram yfir miðjan sunnudag.
Verkefni á Menningarnótt voru annars hefðbundin, en lögreglan sinnti útköllum vegna líkamsárása, heimilisofbeldis, fíkniefnamála og innbrota svo eitthvað sé nefnt. Þá voru nokkrir teknir fyrir ölvunar- og fíkniefnaakstur. Eitthvað var sömuleiðis um meiðsl á fólki, en svo virðist sem hinir sömu hefðu flestir misst fótanna vegna drykkju og voru nokkrir fluttir á slysadeild þar sem gert var að sárum þeirra.
Lögreglan hafði enn fremur afskipti af unglingum víðs vegar á miðborgarsvæðinu og lagði hald á áfengi sem var í fórum þeirra og hafði því næst samband við foreldra og forráðamenn viðkomandi. Ekki voru allir samstarfsfúsir sem urðu á vegi lögreglu á Menningarnótt, en piltur sem hafði óhreint mjöl í pokahorninu reyndi að komast undan lögreglumönnum þegar þeir þurftu að ræða við hann. Pilturinn náði að bíta tvo lögreglumenn, m.a. í fingur, en við leit á honum fannst hnífur, sem var haldlagður. Á meðan á þessu stóð gerði hópur ungmenna aðsúg að lögreglumönnum á vettvangi, en slíkt er því miður ekki einsdæmi.