Klukkan hálfellefu í gærkvöld voru þrír menn handteknir í Hafnarfirði grunaðir um brot á vopnalögum og fíkniefnalagabrot. Að lokinni yfirheyrslu voru þeir látnir lausir. Þetta kemur fram í dagbók lögreglunnar um verkefni gærkvöldsins og í nótt. Enn fremur þetta:

Samkvæmt dagbókinni virðist maður sem framdi rán í Subway í Vesturbænum í gærkvöld enn ganga laus. Hann var óvopnaður og var í raun um gripdeild að ræða, maðurinn hirti peninga af staðnum og hljóp burtu. Lögregla veit ekki hver maðurinn er en sjónavottar sáu hann hlaupa burt og niður Hringbraut.

Rétt fyrir miðnætti var maður í Breiðholti handtekinn vegna gruns um fíkniefnamisferli, við leit heima hjá honum fannst töluvert magn fíkniefna. Maðurinn var látinn laus að lokinni skýrslutöku.

Þá var maður handekinn í miðbænum í nótt vegna gruns um þjófnað á farsíma. Annar maður var handtekinn á sama svæði vegna skemmdarverka og húsbrots, en hann gistir fangageymslu.

Allmargir ökumenn voru stöðvaðir vegna gruns um ölvunarakstur eða akstur undir áhrifum fíkniefna og fjölmörg verkefni voru vegna ölvunar og hávaða í heimahúsum.