Norska ríkissjónvarpið NRK munu sýna sjónvarpsþátt næstkomandi nóvember þar sem venjulegt fólk mun hafa samfarir. Þetta er gert til þess að hjálpa unglingum að fræðast um eigin líkama, þrár og hvatir.
Þátturinn Line fikser kroppen, eða Lína lagar líkama sinn, verður í stjórn sjónvarpsstjörnunnar Line Elvsåshagen. Hún var nýlega með þætti sem báru heitið Line dater Norge, eða Line fer á stefnumót við Noreg, þar sem hún leitaði að hinum fullkomna manni.
Forsvarsmenn NRK leita nú að pörum, venjulegu fólki, til að taka þátt í upptökum þáttanna. Elvsåshagen segir: „Hugmyndin er ekki að sýna kynfærin sjálf á meðan kynlífinu stendur. Við viljum sýna kynlíf sem innilegt en á sama máta nokkuð klaufalegt fyrirbæri.“
NRK hafa auglýst víðs vegar um Noreg, bæði á netinu og með plaggötum. Nú þegar hafa nokkur pör svarað kallinu og sagst vera viljug til að taka þátt.
Takmark þáttanna er að afmá þær hugmyndir um kynlíf sem margir unglingar hafa eftir að hafa séð leikið klámefni. Håkon Moslet hjá NRK segir:
„Ef við sjáum aðeins líkama sem hefur verið mikið breytt með skurðaðgerðum og aðeins leikstýrðar stellingar þá fáum við rangar hugmyndir um kynlíf. Við ætlum að sýna alvöru kynlíf frá byrjun til enda, ekki aðeins samfarirnar sjálfar. Við vonum að við getum náð til markhóps okkar með þessari aðferð.“ En aðalmarkhópurinn verða stúlkur í kringum 17 ára aldurinn.
Norðmenn hafa notað sjónvarp mikið sem kynfræðsluverkfæri í gegnum tíðina. Árið 2015 stýrði leikkonan Line Jansrud þætti þar sem hún kenndi börnum og unglingum um ýmsa þætti sem tengjast kynlífi svo sem sjálfsfróun, mök, kynþroska og sogbletti. Vakti nokkra athygli þegar hún notaði tómat til að sýna það hvernig ætti að „fara í sleik“.
