Yfirvöld í Venesúela rannsaka nú þjófnað á dýrum úr dýragarði í Zulia-héraði í vesturhluta landsins. Lögreglu grunar að dýrunum hafi verið stolið áður en þau voru borðuð. Efnahagsástand Venesúela er afar slæmt og þurfa margir íbúa að hafa mikið fyrir því að nálgast mat og aðrar nauðsynjar.
Vefútgáfa breska blaðsins The Guardian fjallar um þetta og hefur eftir lögreglu að tveimur pekkarísvínum, sem svipar til villisvína, hafi verið stolið úr Zulia Metropolitan-dýragarðinum, nærri landamærum Kólumbíu, um helgina.
„Okkur grunar að þau hafi verið tekin til að verða borðuð,“ segir Luis Morales, fulltrúi lögreglunnar á svæðinu.
Sem fyrr segir er efnahagsástand landsins afar bágborið og er matarskortur í landinu mikill. Dæmi eru um að íbúar leiti eftir mat í ruslagámum og á ruslahaugum. Nicolas Maduro, forseti landsins, hefur kennt stjórnarandstöðunni og mótmælum um ástandið í landinu og þá hafi yfirvöld í Washington horn í síðu stjórnvalda í Venesúela.
Leonardo Nunez, forsvarsmaður umrædds dýragarðs, segir að þetta sé ekki í fyrsta sinn sem dýrum er stolið úr garðinum. Á undanförnum vikum hafi um tíu skepnur horfið, þar á meðal vísundur sem var drepinn í garðinum og sundurlimaður.