Fjölgun félagslegra íbúða í Reykjavík

Eiga 10% allra tveggja herbergja íbúða í Reykjavík
Félagsbústaðir Eiga 10% allra tveggja herbergja íbúða í Reykjavík
Mynd: Mynd: DV

Velferðarráð Reykjavíkur samþykkti í gær, 17. ágúst að auka framboð á félagslegu húsnæði til skamms tíma í samræmi við húsnæðisáætlun Reykjavíkurborgar. Tillögurnar fjórar, sem allar voru samþykktar voru svohljóðandi:

  1. Félagsbústaðir hefji byggingu á tveimur til fjórum litlum fjölbýlishúsum með 8 – 10 einstaklingsíbúðum með fjölbreytileika og félagslega blöndun í huga.
  2. Samhliða kaupum Félagsbústaða á 1- 2 herbergja íbúðum á almennum markaði verði gert átak í að fjölga íbúðum fyrir barnafólk.
  3. Tryggt verði fjármagn til kaupa eða leigu á íbúðum sem verði nýttar sem skammtímalausnir þar til þær íbúðir Félagsbústaða sem eru í undirbúningi, s.s. í gegnum leigufélögin Bjarg og Búseta verða tilbúnar. Velferðarsvið hefur nú þegar hafið vinnu við útfærslu hugmynda að framkvæmdinni, það er inntökuferli í bráðabirgðahúsnæði, rekstur og aðra umsýslu.
  4. Í framhaldi af greiningu velferðarsviðs á stöðu barnafjölskyldna í mikilli þörf fyrir húsnæði verði gerð áætlun fyrir hverja fjölskyldu, þar sem horft verði á skammtímalausnir þar til hægt verður að tryggja varanlegt húsnæði á vegum Félagsbústaða.

Á fundinum var einnig tilkynnt að 27 félagslegum íbúðum hafi verið úthlutað þann daginn. 18 almennar leiguíbúðir og 9 þjónustuíbúðir fyrir aldraða.

Langir biðlistar

1081 einstaklingar eru á biðlista Reykjavíkurborgar eftir félagslegu húsnæði. 782 eru metnir í mikilli þörf og 299 í þörf fyrir slíkt húsnæði. Flestar umsóknirnar, 75% eru um einstaklings og tveggja herbergja íbúðir. Félagsbústaðir eiga í dag um 10% af öllum tveggja herbergja íbúðum í borginni. Reykjavík á í dag hlutfallslega langflestar félagslegar íbúðir.

Í tilkynningu Velferðarráðs segir: „Velferðarráð fagnar metnaðarfullri húsnæðisáætlun sem gerir ráð fyrir mikilli fjölgun félagslegra íbúða, sértækra búsetuúrræða og annarra leiguíbúða og búseturéttaríbúða á næstu árum. Slík uppbygging stuðlar að heilbrigðari húsnæðismarkaði. Mikilvægt er að önnur sveitarfélög láti sitt ekki eftir liggja þannig að vandinn leysist eins fljótt og nauðsynlegt er.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.