Brotist var inn í elstu íslensku kirkju Vesturheims aðfaranótt mánudagsins 14. ágúst. Það er fréttastöðin CBC sem greinir frá þessu. Kirkjan Grund Frelsis Lutheran Church er frá árinu 1899 og stendur í smábænum Baldri í Manitoba fylki í Kanada.
Þrjótarnir höfðu brotið hluta af hendi styttu Jésú Krists sem er jafn gömul kirkjunni og einnig hluta altaristöflunnar. Minni styttu af Jésu hafði verið stolið og fleira smálegu. Bjórdósir og rusl lá út um alla kirkju og ókristileg orð höfðu verið rituð í gestabókina, „Drekktu bjór“ og „Hrelltu mig“. Innbrotið átti sér stað eftir jarðarför sem haldin var í kirkjunni á sunnudeginum.
Sóknarnefndarmaðurinn Don Guðnason var miður sín eftir að hann sá ummerki innbrotsins. „Það er erfitt að trúa því að nokkur maður fari inn í kirkju til að gera slíkan hlut. Ég veit ekkert hvað þeim stóð til. Öll sóknin er í losti að slíkur hlutur geti gerst hérna í sveitinni.“
Hlutir úr kirkjunni fundust á malarvegi sem liggur norður úr bænum. Sá vegur er aðallega notaður af vöruflutningabifreiðum yfir sumarmánuðina. Don grunar einnig að gerendurnir séu að minnsta kosti tveir að verki. Hann segir að sennilega hafi dólgarnir náðst á myndbandsupptöku en enginn í sóknarnefnd viti hvar þær eru.
Kirkjan er yfirleitt skilin eftir ólæst en nú gæti þar orðið breyting á. „Það eru allir í uppnámi yfir þessu. Ekki einu sinni kirkjan okkar er örugg þessa dagana.“
Don segir að kirkjan sé lítil og ekki rík. Reynt verði þó eftir fremsta megni að koma henni í fyrra horf fyrir messu á sunnudaginn kemur.