Natalee Holloway fór í útskriftarferð fyrir tólf árum en hefur ekki sést síðan
Aðstandendur Natalee Holloway gætu brátt fengið svör um afdrif hennar en hún hvarf sporlaust fyrir tólf árum, þá átján ára gömul.
Natalee, sem var bandarísk, var í útskriftarferð með samnemendum sínum á eyjunni Aruba í Karíbahafi þegar hún hvarf. Þrátt fyrir rannsókn lögreglu á sínum tíma fannst stúlkan ekki, en strax vaknaði þó grunur um að henni hafi verið ráðinn bani.
Dave Holloway, faðir Natalee, hefur ekki gefist upp í baráttunni um afdrif dóttur sinnar og á síðustu átján mánuðum hefur hann heimsótt eyjuna ásamt einkaspæjaranum TJ Ward. Fyrir skemmstu fengu þeir ábendingu sem varð til þess að líkamsleifar fundust fyrir aftan hús eitt á eyjunni.
„Við höfum elt margar vísbendingar en þessi er sú áreiðanlegasta sem við höfum fengið á síðustu tólf árum,“ sagði Dave í viðtali við Today. Umrædd ábending kom frá einstaklingi sem sagðist hafa aðstoðað hollenskan karlmann, Joran Van der Sloot, við að losa sig við líkið af Natalie. Joran þessi lá undir grun í málinu á sínum tíma en neitaði ávallt sök. Hann afplánar nú 28 ára fangelsisdóm í Perú fyrir morð á ungri konu, Stephany Flores, árið 2010.
DNA-rannsókn fer nú fram en hún mun skera úr um hvort líkamsleifarnar séu af Natalie eður ei. Aðstandendur Natalee segja að líklega muni niðurstöður fást innan mánaðar.