Afgerandi niðurstöður könnunar BHM
Um 92 prósent þeirra sem svöruðu nýrri könnun sem gerð var meðal félagsmanna aðildarfélaga BHM eru hlynnt því að vinnuvikan verði stytt í 37,5 stundir ef það skerðir ekki kjör þeirra. Þetta kemur fram í tilkynningu sem samtökin sendu frá sér.
Flestir, eða 41 prósent, sögðu að það myndi henta sér best að vinna einn dag í viku til hádegis ef vinnuvikan yrði stytt með þessum hætti en 29 prósent töldu að það myndi henta þeim best að hætta hálftíma fyrr á hverjum vinnudegi. Um 17 prósent vilja vinna lengur fjóra daga vikunnar og eiga einn frídag.
BHM og önnur heildarsamtök launafólks hafa lagt áherslu á styttingu vinnuvikunnar í viðleitni til að skapa fjölskylduvænan vinnumarkað og auðvelda fólki að samræma störf og einkalíf. Í þessu sambandi má nefna að BSRB hefur í samstarfi við bæði Reykjavíkurborg og ríkið gert tilraunir með styttingu vinnuvikunnar á völdum vinnustöðum sem þykja hafa gefið góða raun.
Í tilkynningunni er bent á að um þessar mundir búi 17 aðildarfélög BHM sig undir að hefja samningaviðræður við ríkið en gildistími gerðardóms frá 2015 rennur út í lok mánaðar. Í könnuninni var meðal annars spurt hvað aðildarfélögin ættu að leggja mesta áherslu á við gerð næstu kjarasamninga. Rúmlega helmingur svarenda vill að mest áhersla verði lögð á hækkun launa og kaupmáttar en um fjórðungur telur að leggja eigi mesta áherslu á styttingu vinnuvikunnar.
Könnunin var gerð af fyrirtækinu Maskínu ehf. dagana 5. maí til 28. júní sl. og náði til handhófsúrtaks úr félagaskrám aðildarfélaga BHM sem eru 27 að tölu. Svarendur voru 2.232 en samtals eru um 13 þúsund manns innan raða félaganna.
Hér að ofan gefst lesendum kostur á að svara spurningu um styttingu vinnuvikunnar og hvetjum við sem flesta lesendur til að taka þátt.