Karlmaður var fyrr í dag handtekinn af sérsveit lögreglu eftir að hafa hótað að skjóta fólk vegna vatnsleka í skrifstofuhúsnæði við Cuxhavengötu í Hafnarfirði. Maðurinn er leigjandi þar og mun hafa hringt í Neyðarlínuna vegna lekans og hótað að taka til vopna ef ekkert yrði gert við lekanum.
RÚV greinir frá þessu. Þar er haft eftir Sævari Guðmundssyni, varðstjóra hjá Lögreglunni á höfuðborgarsvæðinu, að „eitt og annað“ hafi fundist við húsleit hjá manninum. Sævar vildi ekkert segja um hvort skotvopn hafi fundist hjá manninum.
Fjarðarfréttir greindu fyrst frá málinu og birtu fjölda mynda af vettvangi. Þar er sagt að starfsfólki í húsinu hafi verið sagt að það væri sprengihætta á fjórðu hæð hússins .