Mæðgur fóru með eldri konu í Arion banka og náðu í 30 milljónir í reiðufé: Starfsfólk á að vera vakandi yfir grunsamlegu athæfi

Gengu út með 30 milljónir í reiðufé - Undarlegt símtal - Sökuð um að halda aldraðri konu nauðugri

Lögreglan á Norðausturlandi rannsakar nú mál sem snýr að fjársvikum og hugsanlegri frelsissviptingu á eldri konu á Akureyri. Talið er að um sé að ræða móður og dóttur hennar og að þær séu frænkur brotaþola.

Gengu út úr bankanum með 30 milljónir í reiðufé

Dóttirin, sem er fertug að aldri, bað brotaþola, aldraða konu, um að lána sér peninga fyrir íbúð og sagðist ætla að borga til baka. Í kjölfarið fór dóttirin með konunni í útibú Arion banka þann 23. mars síðastliðinn og tók út 30 milljónir króna í reiðufé af reikningi hennar. Konan aldraða fékk hins vegar ekkert í hendurnar, ekki einu sinni kvittun.

Þegar leið á sumarið og konan hafði ekkert fengið til baka af „láninu“ leitaði hún hjálpar aðstandanda sem réð lögfræðing fyrir hana. Þegar farið var að skoða málið og upp komst að konan hafi látið frænku sína hafa 30 milljónir án nokkurra pappíra var haft samband við mæðgurnar og þess farið á leit að þær greiddu peninginn til baka. Þá sagði móðirin þetta engu skipta: „Gamla konan eigi nóg af peningum“.

Þá var leitað til lögreglunnar sem hóf rannsókn á málinu og mæðgurnar voru yfirheyrðar í kjölfarið. Þá sögðu þær féð ekki hafa verið lán heldur fyrirfram greiddan arf. Hvorug þeirra er þó lögerfingi konunnar og samkvæmt lögum þarf að tilkynna og greiða skatt af fyrirfram greiddum arfi.

Við rannsókn málsins kom í ljós að það var búið að eyða töluverðum hluta af fénu í ýmsa muni. Meðal annars var búið að kaupa bifreið sem greidd var með reiðufé, en bifreiðin var ekki skráð á nafn dótturinnar. Lögreglan lagði hald á þessa muni og það reiðufé sem ekki var búið að eyða. Þá var tillaga um ákæru fyrir fjársvik lögð fram af hálfu brotaþola.

Ætluðu að halda henni yfir nótt

Eftir yfirheyrslu á dótturinni, fimmtudaginn 3. ágúst, sóttu mæðgurnar konuna og fóru með hana upp á lögreglustöð. Þar var þess krafist að kæran yrði dregin til baka en lögreglumenn á vakt sinntu því ekki þar sem klukkan var orðin margt. Þeim var sagt að mæta aftur á stöðina morguninn eftir.

Þá fóru mæðgurnar með konuna á heimili móðurinnar þar sem til stóð að halda henni yfir nóttina en konan vildi fara heim og hafði samband við aðstandendur sína. Tveir menn mættu á staðinn til að sækja hana en annar þeirra er sonur og bróðir gerendanna. Lögreglan var látin vita af ástandinu og lögregluþjónar voru í reiðubúnir að skerast í leikinn ef eitthvað kæmi upp á.

Mennirnir tveir náðu hins vegar að koma konunni af heimili móðurinnar og síðan þá hafa mæðgurnar ekki haft neitt samband við hana. Rannsókn á málinu stendur enn yfir og ekki hefur verið gefin út opinber ákæra á hendur mæðgunum, hvorki fyrir fjársvik né frelsissviptingu. Samkvæmt lögreglunni á Akureyri er málið á þessari stundu aðeins rannsakað sem fjársvikamál. Ekki er vitað hversu langan tíma rannsóknin mun taka en samkvæmt heimildarmanni DV ætti málið ekki að taka langan tíma. Málið sé hvorki umfangsmikið né flókið.

Konunni hefur ekki verið skipaður fjárreiðumaður eftir þetta atvik þar sem hún er talin fær um að taka eigin ákvarðanir. Heimildarmaðurinn segir hins vegar að mál sem þessi séu alltaf erfið „þegar aðilar kunna réttu tökin.“

Starfsfólk á að vera vakandi yfir grunsamlegu athæfi

Höfnuðu viðtali

Hvorug mæðgnanna vildi tjá sig um málið við blaðamann DV þegar leitað var eftir því. Hér eftirfarandi er símtalið sem blaðamaður átti við móðurina en það var með því undarlegra sem heyrst hefur. Nöfnum viðmælenda hefur verið breytt.

Blaðamaður: Góðan daginn. Ert þú Guðrún?

Guðrún: Nei hún er ekki heima.

Sigurður (í öðrum síma á línunni): Guðrún? Jú, þú ert víst heima.

Blaðamaður: Ha?

Guðrún: Siggi, farðu úr símanum! Hvað segirðu?

Blaðamaður: Ert þú Guðrún?

Guðrún: Já.

Blaðamaður: Kristinn heiti ég, blaðamaður hjá DV. Við erum að fara að skrifa um fjársvikamál sem okkur barst til eyrna.

Guðrún: Já.

Blaðamaður: Þú kannast við það?

Guðrún: Já. Ég svara engu um það, ég tala ekkert við ykkur um það, þannig að það er alveg gagnslaust.

Blaðamaður: En það væri gott að heyra ykkar hlið á …

Guðrún: Vertu bara blessaður.

Samkvæmt upplýsingum frá Fjármálaeftirlitinu gera lög ráð fyrir því að starfsfólk fjármálafyrirtækja tilkynni til lögreglu hafi það einhvern grun um að refsivert athæfi sé í gangi. Það er síðan lögreglunnar að meta hvort eitthvað sé hæft í þeim grunsemdum. Einnig er gert ráð fyrir því að fjármálafyrirtæki komi sér upp verkferlum til að taka á slíkum málum. Grunnreglurnar eru hins vegar þær að ef viðkomandi sé fjárráða og hafi persónuskilríki geti hann tekið fé út af reikningi sínum og ráðstafað því að vild.

Þegar leitað var til Arion banka fengust þau svör að ekki væri hægt að fá upplýsingar um einstök mál en að bankinn aðstoði lögreglu eftir því sem frekast er unnt við rannsókn mála sem upp koma. Fjárráða einstaklingar geta ráðstafað fjármunum af reikningum sínum hjá bankanum að vild en ef upphæðir færslna eru yfir ákveðnum mörkum þá eru þær kannaðar sérstaklega og tilkynntar viðeigandi aðilum ef ástæða þykir. Gildir þá einu hvort um sé að ræða millifærslur milli reikninga eða úttekt í reiðufé. Starfsfólk bankans á að vera vakandi yfir því hvað sé að gerast fyrir framan það.

Starfsmaður bankans segir að það sé almennt séð ekki algengt að jafn háar upphæðir og um ræðir í greininni séu teknar út af reikningi í reiðufé, en engar hömlur eru á því hversu háa upphæð sé hægt að taka út í hvert skipti. Ef mjög há upphæð er tekin út þarf að hafa samband við bankann áður til að tryggt sé að nóg reiðufé sé til í viðkomandi útibúi. Magni reiðufjár er haldið í lágmarki í útibúum bankanna, öryggisins vegna. Viðskiptavinir þurfa að láta vita í hvaða seðlum þeir vilji fá úttektina í. Ef tekið er út í 10.000 króna seðlum rúmast 30 milljónir vel fyrir í skjalatösku eða haldapoka.

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.