Hollensku hjónin Nic og Trees Elderhorst héldust hönd í hönd þegar þau kvöddu þennan heim í sumar. Þau höfðu verið gift í 65 ár og voru bæði 91 árs. Það sem gerir sögu hjónanna sérstaka er sú staðreynd að þau ákváðu að deyja saman.

Líknardráp eru lögleg í Hollandi og það var valkostur sem hjónunum stóð til boða eftir að heilsu þeirra fór að hraka fyrir nokkrum árum. Nic fékk heilablóðfall árið 2012 og í kjölfarið skertist hreyfigeta hans talsvert. Trees þjáðist hins vegar af elliglöpum og átti auk þess orðið erfitt með gang. Ef Nic hefði látist á undan Trees hefðu örlög hennar orðið þau að flytja á dvalarheimili fyrir aldraða. Það hugnaðist henni ekki og því varð líknardráp fyrir valinu.

Í umfjöllun um þetta mál sem breska blaðið Telegraph vitnar til kemur fram að þó líknardráp hafi verið lögleg í Hollandi í fimmtán ár sé það sjaldgæft að hjón ákveði að deyja í sameiningu. „Það var þeirra stærsta ósk að fá að deyja saman,“ segir dóttir hjónanna. „Þau gáfu hvort öðru stóran koss og dóu síðan meðan þau héldust hönd í hönd,“ bætir hún við en hjónin létust þann 4. júní síðastliðinn.

Í frétt breska blaðsins Independent kemur fram að samkvæmt hollenskum lögum þurfi sjúklingar að sýna fram á að þeir þjáist af „óafturkræfum og óbærilegum kvölum“ áður en orðið er við beiðni um líknardráp. Fulltrúi samtaka um líknardráp í Hollandi segir að sjaldgæft sé að hjón uppfylli öll skilyrði sem til þarf. Fylgst var með hjónunum í sex mánuði áður en nefnd varð við ósk þeirra.