Grace Mugabe, eiginkona Roberts Mugabe, forseta Simbabve, gaf sig fram við lögreglu í Suður-Afríku í dag eftir að hún var sökuð um að ráðast á unga konu á hóteli í Jóhannesarborg á sunnudagskvöld.

Grace, sem er 52 ára, var ekki handtekin heldur gaf hún sig sjálf fram við lögreglu og mun hún mæta fyrir dómara í vikunni vegna málsins. Unga konan sem sakar Grace um að hafa ráðist á sig er tvítug og heitir Gabriella Engels. Segir hún að lífverðir forsetafrúarinnar hafi staðið aðgerðalausir hjá meðan Grace réðist á hana.

Gabriella birti myndir af meintum áverkum eftir árásina og á einni slíkri má sjá slæman skurð á höfði hennar. Sagði hún að Grace hefði notað framlengingarsnúru við árásina sem hafi verið tilefnislaus.

Grace var að heimsækja syni Roberts Mugabe á umrætt hótel þegar atvikið átti sér stað. Lögregla sagði í yfirlýsingu að rannsókn málsins væri langt á veg komin.