Birgitta Jónsdóttir, fulltrúi Pírata í stjórnskipunar- og eftirlitsnefnd, birtir á Facebook-síðu sinni viðbót sína við bókun minnihlutans um mál Roberts Downey, dæmds kynferðisbrotamanns. Þar segir hún að Brynjar Níelsson, formaður nefndarinnar, hafi blekkt minnihlutann til að gangast undir trúnað um hina valinkunnu sem mæltu með að Robert Downey fengi uppreista æru.
Birgitta segist hafa óskað eftir því að strikað yrði yfir heilsufarsupplýsingar sem voru forsenda þess að nefndarmenn yrðu bundnir trúnaði. „Birgitta Jónsdóttir óskaði eftir því að strikað yrði yfir þær viðkvæmu heilsufarsupplýsingar sem ráðuneytið sagði að væru að finna í meðmælabréfunum, til að unnt væri að ræða á opinn máta annað það sem tengist meðmælunum. Óskaði þingmaðurinn að þetta yrði gert áður en nefndarmenn fengu bréfin til skoðunar. Formaður nefndarinnar sinnti því í engu,“ segir í viðbót Birgittu.
Hún segir að engar viðkvæmar heilsufarsupplýsingar hafi verið í umræddum gögnum. „Síðan kom í ljós að engar viðkvæmar heilsufarsupplýsingar voru að finna í bréfunum og telur þingmaðurinn að nefndinn hafi verið blekkt til að vera sett undir almennar reglur þingskapa um trúnað. Það er mjög alvarlegt og grefur undan trúverðugleika nefndarinnar að framkvæmdavaldið sem nefndin á að hafa undir eftirliti um góða stjórnsýsluhætti og veita aðhald geti múlbundið nefndarmenn á þennan máta,“ segir í viðbótinni.