Rúm 16 kíló af kókaíni haldlögð á Keflavíkurflugvelli fyrstu sjö mánuði ársins
Tollgæslan á Keflavíkurflugvelli hefur lagt hald á mikið magn fíkniefna það sem af er ári og mun meira en á sama tíma á síðasta ári. Þetta kemur fram í tilkynningu frá lögreglustjóranum á Suðurnesjum og tollstjóra.
Þar segir að fyrstu sjö mánuði ársins hafi hald verið lagt á 16.203 grömm af kókaíni af mismunandi styrkleika og 1.950 millílítra af fljótandi kókaíni. Samkvæmt mati rannsóknarstofu samsvarar magn fljótandi kókaínsins 4.500 grömmum af kókaíni í neyslustyrkleika.
Þá segir í tilkynningunni að haldlagðir hafi verið 700 millílítrar af fljótandi amfetamíni sem samkvæmt mati rannsóknarstofu samsvara 6.998 grömmum af efninu í neyslustyrkleika. Loks var hald lagt á 196,5 grömm af metamfetamíni og 0,19 grömm af hassi.
„Lögreglan á Suðurnesjum fer með rannsókn þessara mála. Um 20 sakamál er að ræða en sakborningar voru erlendir ríkisborgarar nánast í öllum tilvikum. Þeir hafa allir setið í gæsluvarðhaldi meðan á rannsókn og ákærumeðferð hefur staðið. Það fer eftir magni haldlagðra efna hverju sinni hvaða embætti fer með saksóknina. Lögreglustjórinn á Suðurnesjum annast saksókn í minni málunum en Héraðssaksóknari í þeim stærri.
Dómar hafa þegar fallið í 15 málum og refsingar verið fangelsisdómar frá 2 mánuðum til 3½ árs en gæsluvarðhaldstími kemur til frádráttar. Þá hafa efnin verið gerð upptæk,“ segir í tilkynningunni.