Fréttir af skokkara á Putney Bridge í London sem ýtti konu í veg fyrir strætisvagn vöktu mikla athygli í vikunni. Myndband sem birt var með fréttum af atvikinu má sjá hér að neðan en þar virðist hlauparinn ýta gangandi konu viljandi fyrir strætisvagn. Konan hlaut minniháttar meiðsl en þar var fyrir að þakka snarræði vagnstjórans.

Fyrir helgi bárust síðan fréttir um að lögreglan hefði fundið og handtekið hlauparann. Núna hefur hins vegar komið í ljós að hinn handtekni var alls ekki hlauparinn alræmdi. Um var að ræða 41 árs gamlan bankamann að nafni Eric Bellquist. Hann hefur verið látinn laus og lögregla hefur lýst því yfir að hann sér hreinsaður af öllum grun í málinu.

Lögreglan lýsir því enn eftir hlauparanum sem í hlut átti og biðlar til mögulegra sjónarvotta um að gefa sig fram og veita upplýsningar í málinu.

Margir sem hafa horft á myndskeiðið af atvikinu telja að hér hafi verið um morðtilraun eða tilraun til manndráps að ræða. Aðrir vilja ekki ganga svo langt í túlkun á því sem fyrir augu ber. Einhverjir telja að konan hafi reynt að bregða fæti fyrir hlauparann og því hafi það verið varnarviðbrögð hjá honum að ýta við henni.

Lesendur geta skoðað myndbandið hér að neðan og dæmt sjálfir.

Nánar má lesa um máið hér.