Sigurvegari í leiknum #rauttAk á bæjarhátíðinni Ein með öllu hlaut ekki aðalvinninginn
„Þetta voru mannleg mistök,“ segir Arna Sif Þorgeirsdóttir hjá Viðburðarstofu Norðurlands en ruglingur varð til þess að sigurvegarinn í leiknum #rauttAk í bæjarhátíðinni Ein með öllu á Akureyri hlaut ekki auglýstan vinning – grill frá Byko og innleggsnótu frá Nettó.
Eitthvað voru reglur leiksins á reiki en á vefsíðu hátíðarinnar voru bæjarbúar hvattir til að skreyta hús sín með rauðum litum og senda inn myndir. Það hús sem fengi flest „læk“ á síðunni skyldi hljóta vinninginn en dómnefnd myndi velja best skreyttu götuna. Á sunnudaginn var ljóst að hús í Hraunholti hafði hlotið flestu „lækin“ en á sparitónleikunum um kvöldið, þar sem úrslit voru tilkynnt, var hús í Einholti kunngert sem sigurvegari.
„… þetta var bara klúður sem mun ekki koma fyrir aftur“
Arna Sif segir mistökin liggja í því að þar sem allt Hraunholtið hafi verið vel skreytt hafi húsið sem fékk flestu „lækin“ fallið inn í götuna. Það hafi hins vegar verið Vættagil sem hlotið hafi verðlaun sem best skreytta gatan.
„Eigandi hússins sem fékk verðlaunin er á engan hátt tengdur einhverjum í dómnefnd. Það er ekkert slíkt í gangi, þetta var bara klúður sem mun ekki koma fyrir aftur. Við höfum haft samband við raunverulegan sigurvegara sem fær gjafabréf í sárabætur. Ein með öllu gekk mjög vel að þessu sinni og það er afar leiðinlegt að þetta mál skuli setja blett á þessa skemmtilegu hátíð. Þetta var hins vegar óvart og eru hlutaðeigandi beðnir afsökunar.“
Davíð Rúnar Gunnarsson, hjá Viðburðarstofu Norðurlands og framkvæmdastjóri hátíðarinnar, sagðist hafa heyrt lítillega af málinu þegar blaðamaður náði tali af honum. Hann gat ekki útskýrt hvað hefði gerst en sagði leiðinlegt ef mistök hefðu orðið.