Konur í annarlegu ástandi sáu til þess að lögreglumenn sætu ekki auðum höndum í gærkvöldi og nótt. En karlar komu einnig við sögu lögreglunnar en þó voru þeir ekki eins áberandi og konur þessa nóttina.
Á sjötta tímanum í gær var kona í annarlegu ástandi handtekin en hún er grunuð um þjófnað úr verslun í Kópavogi. Hún var vistuð í fangageymslu.
Um klukkan 20 í gærkvöldi var kona í annarlegu ástandi handtekin við verslun í Austurstræti. Hún hafði verið staðin að þjófnaði og skemmdi síðan þjófavarnarhlið þegar hún yfirgaf verslunina. Hún var vistuð í fangageymslu vegna rannsóknar málsins.
Um klukkan 1 í nótt var kona í mjög annarlegu ástandi handtekin á heimili við Sléttuveg en þangað hafði verið óskað eftir lögreglu vegna óláta. Konan fór ekki að fyrirmælum lögreglu og reyndi að slá lögreglumenn. Hún er einnig grunuð um vörslu fíkniefna. Hún var vistuð í fangageymslu.
Um klukkan 20 í gærkvöldi var karlmaður í annarlegu ástandi handtekinn við Langholtsveg. Hann er grunaður um vörslu fíkniefna og eignaspjöll. Hann var vistaður í fangageymslu.
Þrír ökumenn voru handteknir í nótt en þeir eru allir grunaðir um ölvun við akstur.