Skömmu eftir að hún hafði gifst ástinni sinni einu og sönnu fékk hún hræðilegar upplýsingar sem sviptu hulunni af skelfilegu leyndarmáli eiginmannsins. Verra gat það varla orðið og væntanlega er hjónabandið á enda.

Á mánudaginn var maðurinn, Jake Jensen, sem er 29 ára handtekinn og kærður fyrir að hafa orðið 19 mánaða dóttur konunnar að bana í janúar 2016. Jensen var ekki faðir stúlkunnar. New York Post skýrir frá þessu.

Þar kemur fram að þann 2. janúar 2016 hafi sjúkraflutningsmenn verið sendir á heimili móðurinnar og unnusta hennar, Jake Jensen, í Utah í Bandaríkjunum. Dóttir konunnar hafði fengið flogakast. Móðirin og Jensen vildu ekki láta flytja stúlkuna á sjúkrahús en lofuðu að fara með hana til læknis.

Lögreglan segir að það hafi þau ekki gert. Tveimur dögum síðar fékk stúlkan annað flogakast og var þá loks farið með hana á sjúkrahús. Hún var meðvitundarlaus við komuna þangað og komst aldrei aftur til meðvitundar áður en hún lést.

Hún var með áverka á höfði og augum og báðir fótleggir hennir voru brotnir. Læknar á Primary Children‘s sjúkrahúsinu sögðu að áverkar hennar væru þess eðlis að hún hefði orðið fyrir alvarlegu líkamlegu ofbeldi og að hún hefði líklegast þjáðst um hríð.

Í bæði skiptin sem litla stúlkan fékk flog var Jensen einn heima með hana en móðir hennar var í vinnu. Hann gat ekki gefið neinar skýringar á áverkunum.

Stúlkan fæddist töluvert fyrir tímann og var með heilaskemmdir og var því seinþroska auk þess sem hún var máttlítil í vinstri hlið líkamans.

Móðir hennar og Jensen eignuðust barn í júní.