Systur heyrðu hljóð berast úr runna - Brá mikið þegar þær kíktu inn í hann

Síðdegis á þriðjudaginn voru tvær systur í gönguferð í hverfinu sem þær búa í. Skyndilega heyrðu þær undarleg hljóð berast frá runna í bakgarði íbúðarhúss í hverfinu. Þær fóru og könnuðu málið. Þegar þær kíktu inn í runnann brá þeim mikið og hringdu strax í lögregluna.

Inni í runnanum var plastpoki og út úr honum stóðu tveir agnarsmáir fætur. Systurnar opnuðu að sjálfsögðu pokann og fundu kornabarn í honum. Þetta reyndist vera stúlka. Móðir hennar hafði skilið hafa eftir í poka í runnanum þremur dögum áður en litla stúlkan hafði lifað af í þrjá daga í pokanum inni í runnanum.

Þetta átti sér stað í bænum Elmira í New York ríki í Bandaríkjunum. Önnur systranna sagði í samtali við Weny sjónvarpsstöðina að aðeins fætur stúlkunnar hafi staðið út úr pokanum en höfuð hennar hafi verið alveg hulið inni í pokanum.

Stúlkan var strax flutt á sjúkrahús og er ástand hennar stöðugt að sögn yfirvalda.

Lögreglan hefur nú haft uppi á móður stúlkunnar en hún er 17 ára og býr í bænum Sayre í Pennsylvania en hann er í um 30 km fjarlægð frá Elmira. Móðirin var handtekin og á yfir höfði sér að verða ákærð fyrir morðtilraun. Hún situr nú í gæsluvarðhaldi.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.