Piltur frá Vestmannaeyjum með kynferðislegar hugsanir sem snúast um börn, dýr, dautt fólk og nauðganir: Flytur á heimavist menntaskóla

Mynd: 123rf.com

Piltur sem er haldinn barnagirnd og hefur viðurkennt að hafa beitt bróður sinn kynferðisofbeldi mun síðar í mánuðinum hefja nám í menntaskóla. Á meðan á því stendur mun hann búa á heimavist skólans ásamt unglingum allt niður í 15 ára aldur. Sálfræðingur heldur fram að drengurinn hafi unnið í sínum málum.

Hæstiréttur felldi í gær úr gildi ákvörðun Lögreglustjórans í Vestmannaeyjum að pilturinn sæti nálgunarbanni gegn bróður sínum. Í þeim dómi kemur fram að pilturinn sé haldinn mjög brengluðum kynferðislegum hugsunum. Hann hafi kynferðislegar hugsanir sem snúist um börn, dýr, dautt fólk, nauðgun og stelpur sem hann hafi verið með í skóla.

Í dómnum kemur fram að þessar hugsanir hafi stýrt honum og telur geðlæknir að það geti vel stafað hætta af honum enn í dag. Pilturinn braut síðast á bróður sínum í fyrra. „Varnaraðili hafi ekki stjórn á sér þegar kynlífshvatir nái tökum á honum og hann viti ekki hvað gerist ef tækifæri byðist. Þá komi fram að varnaraðili sé á mörkum andfélagslegrar persónuleikaröskunar og siðblindu,“ segir í dómnum.

Þrátt fyrir þetta mun þessi piltur, sem er lögráða og á menntaskólaaldri, hefja nám við menntaskóla utan Reykjavíkur þar sem hann mun dvelja á heimavist. Gögn voru lögð fram sem sýndu fram á að umsókn hans hafi verið samþykkt.

Í dómnum kemur fram að pilturinn hafi fyrst um sinn haldið því fram að hann hafi stundað kynlíf með bróður sínum með samþykki beggja en ekki beitt hann grófu kynferðisofbeldi. Síðar viðurkenndi hann að hafa „suðað“ í bróður sínum að hafa við sig mök. Þolandinn lýsti þó ítrekuðu kynferðislegu, andlegu og líkamlegu ofbeldi af hálfu bróður síns um margra ára skeið. Drengurinn er, samkvæmt vottorði frá sálfræðingi, verulega brotinn eftir langvarandi streituvaldandi aðstæður.

Athygli vekur að foreldrar drengjanna virðast gera lítið úr þessu ofbeldi. Bræðurnir sáust saman í Vestmannaeyjum á dögunum og þrátt fyrir að vera kunnugt um ofbeldið upplýstu foreldrarnir ekki barnaverndarnefnd né lögreglu um málið. „Foreldrar drengjanna hafi ekki upplýst barnaverndarnefnd um breytta stöðu mála en samskipti foreldra og barnaverndar hafi verið takmörkuð þar sem skorti á vilja foreldra til að vinna málið með barnaverndarnefnd,“ segir í dómi.

Verjandi piltsins tók fram að hann hafi verið í sálfræðiviðtölum. Í dómnum segir að hann hafi farið í 40 viðtöl frá desember 2016 og verið í eftirfylgd frá áramótum. Verjandi heldur fram:
„Hann hafi lokið öllum virkum þáttum meðferðar og hafi hún skilað árangri og hafi ekki komið fram upplýsingar um að varnaraðili hafi sýnt af sér frekari óviðeigandi hegðun frá því síðasta vor.“

Foreldrar drengjanna voru jafnframt ósátt við það að lögregla færi fram á nálgunarbann og hvöttu eldri piltinn til að fara ekki eftir því. „ Þá segir í lögregluskýrslunni að foreldrar drengjanna hafi viljað koma því á framfæri að þau væru mjög ósátt við ákvörðun lögreglustjóra um nálgunarbann og væru þau ekki viss um að eftir henni yrði farið,“ segir í dómi.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.