Skellti bílhurð margoft á fætur handtekins manns
Embætti héraðssaksóknara rannsakar nú kæru á hendur tveimur lögreglumönnum, karli og konu, á höfuðborgarsvæðinu. Hið meinta ofbeldi átti sér stað við Hamborgarabúlluna við Dalveg í Kópavogi. Óskað var eftir aðstoð lögreglu þangað vegna tveggja ölvaðra manna. Mennirnir streittust á móti handtöku og eru lögreglumennirnir þá sagðir hafa beitt þá miklu ofbeldi, svo miklu að annar þeirra tvífótbrotnaði.
Fréttablaðið skýrir frá þessu í dag. Þar kemur fram að vitni segi lögreglumennina hafa dregið upp kylfur og ítrekað lamið annan manninn þar sem hann lá á jörðinni. Síðan hafi hinum manninum verið ýtt inn í lögreglubíl og hafi annar lögreglumaðurinn skellt bílhurðinni margoft á fætur hans auk þess að lemja hann ítrekað með lögreglukylfu.
Haft er eftir vitninu að það hafi virst hafa farið mjög illa í annan lögreglumannin að ölvuðu mennirnir eru pólskir og hafi ekki virst skilja það sem sagt var við þá.
Vitnið, sem er starfsmaður á Hamborgarabúllunni, sagði að þegar tekist hafði að loka annan Pólverjann inni í lögreglubílnum hafi lögreglumennirnir ekið á brott með hann en skilið hinn eftir en sá hafi verið mjög æstur. Fólki sem sá aðfarir lögreglumannanna hafi verið mjög brugðið enda um gróft ofbeldi að ræða af hálfu lögreglumannanna.
Lögreglumennirnir eru enn við störf en Sigríður Björk Guðjónsdóttir, lögreglustjóri á höfuðborgarsvæðinu, staðfesti að þeim hefði ekki verið vikið tímabundið frá störfum á meðan málið er til rannsóknar.
Kolbrún Benediktsdóttir, varahéraðssaksóknari, staðfesti við Fréttablaðið að málið sé til rannsóknar.