17 ára stúlka lést af völdum áverka er hún hlaut í gær þegar 15 ára stúlka stakk hana og aðra manneskju í Sørlandssenteret í Kristiansand í Noregi. Mikið öngþveiti og skelfing greip um sig í verslunarmiðstöðinni þegar stúlkan hljóp þar um með hníf á lofti og öskraði og veinaði.
Lögreglunni var tilkynnt um málið klukkan 17.30 í gær. Stúlkan ógnaði öryggisvörðum, starfsfólki í verslunarmiðstöðinni og viðskiptavinum. Hún hafði strokið frá unglingaheimili fyrr um daginn. Stúlkan sem lést starfaði í matvöruverslun í verslunarmiðstöðinni. Ekki hefur verið skýrt frá alvarleika meiðsla hins aðilans sem stúlkan stakk.
Vitni sögðu norskum fjölmiðlum að mikið hefði gengið á í verslunarmiðstöðinni og kallað hefði verið eftir aðstoð lækna í hátalarakerfi hennar.
Lögreglan kom fljótt á vettvang og handtók stúlkuna án þess að hún veitti mótspyrnu. Hún hefur komið við sögu lögreglunnar áður.