Sameinuðu þjóðirnar áætla að kókaínframleiðslan í Kólumbíu á síðasta ári hafi verið þriðjungi meiri en 2015. Kókaplöntur voru ræktaðar á 146.000 hekturum lands en 2015 var ræktun á 96.000 hekturum lands.
Blöðin af kókaplöntum eru notuð til að framleiða kókaín. Á undanförnum árum hafa stjórnvöld í Kólumbíu barist harkalega gegn kókaínframleiðslu til að reyna að hrista það slæma orðspor, sem fer af landinu sem kókaínhöfuðborg heimsins, af því. Bandaríkin hafa stutt við bakið á kólumbískum stjórnvöldum í þessari baráttu. En nú er framleiðslan komin á sama stig og hún var áður en þessi barátta hófst.
Í byrjun árs kynntu kólumbísk stjórnvöld metnaðarfulla áætlun sína um að ryðja 100.000 hektara lands, sem eru notaðir við kókaínrækt, fyrir árslok. Helmingur landsins verður tekinn með valdi en semja á við bændur um hinn helminginn og þeim boðið að rækta eitthvað annað og fá þá fjárstuðning til þess.
The Guardian segir að 86.000 fjölskyldur, sem eiga 76.000 hektara lands sem eru notaðir til kókaínræktunar, hafi nú þegar skrifað undir samning um að hætta ræktun á kókaplöntum gegn því að hver bóndi fái 11. 000 dollara, sem svara til um 1,2 milljóna íslenskra króna, á næstu tveimur árum.