Ingólfur Þórarinsson, Ingó veðurguð, þvertekur fyrir í samtali við DV að vera sá sem stendur að baki Facebook-síðunni Hægri flokkurinn þrátt fyrir skjáskot sem sýnir hann segja beint út „Við erum stjórnmálaflokkur“. Ummælin voru skrifuð við þráð Facebook-síðunnar Leikmaður les Biblíuna en þar spurði síðuhaldari um nafn þess sem stendur að baki Hægri flokknum. Svo virðist sem Ingólfur hafi ætlað að skrifa athugasemdina í nafni flokksins en hafi óvart gert það í eigin nafni.
Facebook-síða flokksins var eytt þann sama daga og ummælin féllu en Hægri flokkurinn hefur verið nokkuð virkur bæði á Facebook og í athugasemdakerfum fjölmiðla. Líkt og fyrr segir féll athugasemd Ingólfs við þráð Leikmanns les Biblíuna um dagbók „vonda fólksins“ sem má sjá hér.
Þar skrifar flokkurinn: „Það er klárlega skárra að vera vondur en að vera einfaldur og gera allt fyrir like eins og til dæmis rugludallurinn sem þetta skrifar. Væntanlega aldrei fengið virðingu annarsstaðar.“
Leikmaður fer þá fram á að sá sem þetta skrifi geri það undir nafni og þá svarar Ingólfur: „Við erum stjórnmálaflokkur. Hvað heita vinstri grænir? Við sem skrifum fyrir hönd flokksins erum aösannala [sic] að þessi háværa fasíska virtue signalling elíta er stór vandi í nútímasamfélagi. Samfélagsmiðlar hafa gert þetta að verkum að hægt er höfða til tilfinninga í stað rökhugsunar, þar ertu ásamt öðrum fremstur í flokki,“ skrifar Ingólfur.
Ingólfur segist ekki bera ábyrgð á síðunni. „Ég lækaði nú einhvern tímann síðuna og einhverja pósta en ég stóða ekki að henni. Það er ekki alveg svo gott. Það eru nokkrir sem að ég veit að hafa verið að pæla í einhverjum svona hópi en ég hef alls ekki verið að standa að baki þessu. Það er nú eiginlega langt frá því,“ segir Ingólfur.
Spurður um hvort hann telji þá skjáskotið falsað svara hann: „Ég hef nú stundum líkað við eitthvað og eitthvað kommentað en aldrei verið að segjast vera í flokknum.“ Hann segist ekki ætla að, í það minnsta á næstunni, að fara í framboð.
Líkt og fyrr segir hefur Facebook-síðu flokksins verið eytt en með aðstoð Google má þó finna nokkur ummæli sem sögð voru í nafni hans. Þau ummæli má sjá hér fyrir neðan: