Vantar fleiri dómara, rými og tæknibúnað – Hermaður á fölsku vegabréfi hugðist fremja hryðjuverk
Robert Seegmuller, formaður sambands þýskra stjórnsýsludómara, tilkynnti fréttastöðinni RND að fjöldi hælisleitendaumsókna í landinu væri yfirþyrmandi og að kerfið ráði ekki við hann.
Hann segir: „Staðan er mjög alvarleg í stjórnsýsluréttarkerfinu. Við erum komin á ystu nöf. Kerfið þolir þetta ekki til lengri tíma. Á einhverjum tímapunkti mun allt bresta.“
Fréttastöðin gerði úttekt á fjölda hælisleitendaumsókna sem biði afgreiðslu. Þær telja nú um 250.000. Seegmuller segir að bæði vanti fleiri dómara og annað starfsfólk til að sinna þessum málum sem og rými í dómssölum. Þá verði að auka við fjármagn til tölvukaupa til að halda utan um mál hælisleitenda.
Um ein milljón flóttamanna hafa komið til Þýskalands síðustu tvö ár sem setur gríðarlegt álag á allt þýska kerfið. En Seegmuller kvartar einnig undan ákvörðunum innanríkisráðuneytisins í innflytjendamálum og segir að senda ætti fleiri heim til sín samstundis.
Álagið í ráðuneytinu kemur fram í óvönduðum ákvörðunum. Franco Albrecht, þýskur hermaður og öfgahægrimaður, sótti um og fékk stöðu flóttamanns með fölsku sýrlensku vegabréfi. Albrecht talar þó enga arabísku. Hann hugðist framkvæma hryðjuverk og kenna flóttamönnum um en var handtekinn í apríl áður en hann náði að fremja ódæðið. Tveir aðrir menn eru viðrinir málið.
Þetta mál olli því að fara þurfti aftur yfir um 100.000 ákvarðanir ráðuneytisins varðandi hælisleitendur með tilheyrandi töfum og kostnaði. Thomas de Maiziere, innanríkisráðherra, segir að ekki hafi fundist fleiri dæmi um alvarlega misbresti en heitir því að farið verði betur yfir hvert og eitt mál í framtíðinni. „Þetta eru mjög umfangsmiklar aðgerðir en mjög mikilvægar og nauðsynlegar fyrir öryggi landsins.“