Leit stendur yfir af óþekktum manni með keðjusög sem talinn er hafa ráðist á óbreytta borgara í bænum Schaffenhausen í norðurhluta Sviss um klukkan 8:30 í morgun. Fimm manns hafa slasast, þar af tveir alvarlega, og eru sjúkrabílar og stórt lögreglulið á staðnum. Þyrlur svífa nú yfir svæðið í leit að manninum og landamærunum við Þýskaland hefur verið lokað af.
Verslunum bæjarins hefur verið lokað og fólki ráðlagt að halda sig fjarri staðnum þar sem árásin átti sér stað. Lögreglan staðfesti á blaðamannafundi í morgun að árásarmaðurinn væri á flótta og að fullur þungi lögreglunnar væri í leitinni.
Verslunareigandi gerði lögreglu fyrst viðvart þegar hann sá mann ganga um götur bæjarins með keðjusög. Talsmaður lögreglunnar, Cindy Beer, sagði fjölmiðlum morgun: „Það eina sem við vitum er að maðurinn særði fjölda fólks.“ Ekki er þó talið um hryðjuverkaárás sé að ræða á þessari stundu.