Lögreglan á Suðurlandi hefur tilkynnt að maðurinn sem féll í Gullfoss laust fyrir klukkan 17:00 í gær sé hælisleitandi.
Allt tiltækt viðbragðslið á svæðinu var kallað út ásamt björgunarsveitum á nærsvæðum. Þyrla landhelgisgæslunnar er notuð við leitina sem fram fór til miðnættis í gærkvöld og hófst á ný klukkan 10:00 í morgun.
Nokkrir sjónarvottar sem stóðu á útsýnispöllum gátu gefið lögreglu greinargóða lýsingu á manninum. Þá var talað við fjölmarga aðra sem voru á staðnum. Skýrslutökur standa enn yfir vegna málsins.
Lögreglan fann bifreið á bílastæðinu við Gullfoss í gærkvöld sem var tekin til rannsóknar. Þá kom í ljós að um erlendan hælisleitanda er að ræða, sem kom til Íslands fyrir nokkru síðan.
Sveinn Kristján Rúnarsson, yfirlögregluþjónn á Hvolsvelli, segist í samtali við DV hvorki geta staðfest né neitað að um sjálfsvíg sé að ræða. Hann segir að málið sé í skoðun og það eina sem hægt sé að fullyrða sé að ekkert bendir til þess að þetta atvik hafi orðið með saknæmum hætti.