Lögregla telur allar líkur á því að maðurinn sem féll í Gullfoss í gær sé ekki ferðamaður. Þetta segir Sveinn Kristján Rúnarsson, yfirlögregluþjónn á Hvolsvelli, í samtali við DV. Hann treystir sér þó ekki til að segja neitt um þjóðerni mannsins. Hann segir að of snemmt sé að segja til um hvort um slys sé að ræða eður ei. Maðurinn er ófundinn.
Maðurinn féll í Gullfoss rétt eftir klukkan fimm í gær. RÚV greindi frá því í gær að maðurinn hafi hafi sést á milli fossanna skömmu eftir að hann féll en hefur ekki sést síðan. RÚV greindir enn fremur frá því í dag að lögregla teldi sig vita hver það er sem féll í fossinn. Um 150 manns komu að leitinni í gær.
Hlé var gert á leitinni í nótt en fylgst var með ánni í þeirri von að til mannsins sæist. Leitin í gær var úr lofti, af landi, á bátum og einnig voru kafarar að störfum. Sveinn Kristján segir að lögregla muni senda frá sér tilkynningu innan skamms um málið.