Heiðar Guðjónsson, hagfræðingur og fjárfestir, áður Heiðar Már, heldur því fram í Fréttablaðinu í dag að olíu- og gasnotkun hafi bæði stórbætt lífskjör almennings og hafi raunar dregið stórkostlega dregið úr mengun á heimsvísu. Með grein sinni er Heiðar að bregðast við pistli Hildar Knútsdóttur sem gagnrýndi á dögunum harðlega olíuleit Heiðars á Drekasvæðinu.
Hildur nefndi í pistli sínum sjö ástæður fyrir því að olíuvinnsla við Ísland væri ekki góð hugmynd. Þar á meðal nefndi hún áhrif olíuvinnslu á loftslagsbreytingar og að olíuleki frá borholu á Drekasvæðinu gæti haft hrikalegar afleiðingar fyrir Ísland. Hún benti ennfremur á að brennsla á olíu valdi súrnun sjávar.
„En sannleikurinn er auðvitað sá að stærsta framlag Íslendinga í baráttunni fyrir betri heimi gæti einfaldlega verið að hverfa frá áformum um olíuvinnslu og láta olíuna sem kann að leynast á Drekasvæðinu vera. Það er það eina siðferðilega rétta í stöðunni og besta leiðin fyrir okkur að „hjálpa umheiminum“. En Heiðar Guðjónsson talar ekki um siðferði eða réttlæti. Nei, Heiðar er að tala um hagnað. Hann er að tala um peninga,“ skrifaði Hildur.
Pistill Heiðars nefnist Staðreyndir fyrir Hildi Knútsdóttur og nefnir hann fimm punkta. Í fyrsta lagi segir hann lífskjör Íslendinga hafi batnað í kjölfar olíualdarinnar. „Lífskjör almennings hafa aldrei batnað jafn hratt og eftir að olíuöldin hófst eftir miðja 19. öld. Ísland er skýrasta dæmið í þeim efnum. Vegna samgöngubyltingar alfarið í krafti olíu hafa lífsskilyrði þar færst frá að vera ein lökustu í Evrópu í fremstu röð. Notkun Íslendinga á olíu mun aukast með tíðari flug- og skipaferðum. Þeir flutningar eru hagkvæmir, stytta núverandi leiðir og minnka þannig mengun á heildina litið,“ skrifar Heiðar.
Hann segir enn fremur að helsti mengunarvaldur sé kol en ekki olía: „2) Olía og gas hafa komið í stað brennslu á viði, kolum, taði og öðru og þannig dregið stórkostlega úr mengun, slysum og sjúkdómum. 3) Parísarsáttmálinn segir ekki að láta beri olíu- og gaslindir óhreyfðar. Hann hvetur hins vegar til þess að mest mengandi kolefnin (lesist: kol) skuli ekki unnin heldur þau skaðminni (olía og gas).“
Heiðar segir að lokum að öll rök mæli með því að olía og gas verði unnið við Ísland. „Hvergi í heiminum hefur reynst farsælla að vinna orku en í norðri. Olíuvinnsla við Ísland verður ávallt öruggari en þar sem öryggis- og eftirlitsleysi ríkir. Íslendingar nota meiri olíu miðað við höfðatölu en Bandaríkjamenn. Olíuvinnsla hér við land yki sjálfbærni Íslendinga til mikilla muna. Öll rök, siðferðileg, umhverfisleg og efnahagsleg mæla með að olía og gas verði unnið við Ísland,“ skrifar Heiðar.
