Skattakóngar seldu fyrirtæki sín

Gísli J. Friðjónsson greiddi mest - Aðeins þrjár konur á topp tíu

Tæplega 287 þúsund manns töldu fram á síðasta ári og hafa aldrei verið fleiri.
Aldrei fleiri talið fram Tæplega 287 þúsund manns töldu fram á síðasta ári og hafa aldrei verið fleiri.
Mynd: DV ehf / Sigtryggur Ari

Gísli J. Friðjónsson, Kópavogi, er skattakóngur ársins 2016 en Gísli greiddi 570,5 milljónir króna í opinber gjöld á síðasta ári. Gísli er fyrrverandi forstjóri og eigandi Hópbíla en hann seldi fyrirtæki sitt í fyrra til framtakssjóðsins Horns III og má rekja ástæðuna til hárra greiðslna hans þangað.

Í öðru sæti yfir þá sem hæst opinber gjöld greiddu á síðasta ári er Einar Friðrik Sigurðsson, Ölfusi. Einar seldi árið 2015 útgerðarfyrirtækið Auðbjörgu í Þorlákshöfn til Skinneyjar-Þinganess á Höfn í Hornafirði. Einar greiddi 383,9 milljónir króna á síðasta ári í opinber gjöld. Sonur Einars, Ármann, sem einnig er búsettur í Ölfusi, er í fimmta sæti á listanum, greiddi 159,1 milljón króna í opinber gjöld.

Skattadrottning Reykjavíkur

Í þriðja sæti yfir þá sem greiddu hæst opinber gjöld á síðasta ári var Katrín Þorvaldsdóttir í Síld og Fiski en hún greiddi samtals 362,7 milljónir króna. Katrín er jafnframt skattadrottning Reykjavíkur. Þá kemur Guðmundur Kristjánsson, kenndur við fyrirtæki sitt Brim, en hann þurfti að reiða af hendi 231,7 milljónir króna, sem gerir hann að skattakóngi Seltjarnarness.

Leiðrétting

Þau leiðu mistök áttu sér stað að Martha Árnadóttir, framkvæmdastýra Dokkunnar, var tilgreind sem sú sem væri sjötti hæsti skattgreiðandinn hérlendis í ár. Hið rétta er að Marta Árnadóttir, einn eigandi Vero Moda á Íslandi og annarra fyrirtækja, er á listanum yfir hæstu skattgreiðendurna. Beðist er velvirðingar á mistökunum.

Í sjötta sæti á listanum yfir þá sem greiða hæst opinber gjöld er Marta Árnadóttir, annar eigandi Vero Moda á Íslandi og fleiri fyrirtækja, en Marta greiddi 149 milljónir króna á síðasta ári. Grímur Garðarsson, einn eigenda Vörður Capital, er sjöundi og greiddi 149 milljónir króna. Marta býr í Montreal ásamt Grími en þess má geta að Grímur er giftur systur Mörtu, Helgu Árnadóttir. Þau reka fataverslanir ytra og gengur allt í haginn.

Mynd: Bjarni Eiríksson

Einn áfram á lista

Í áttunda sæti situr Kristján Vilhelmsson, útgerðarstjóri og eigandi Samherja, en hann greiddi 143,4 milljónir króna í opinber gjöld og er þar með skattakóngur Akureyrar. Guðrún Birna Leifsdóttir er í níunda sæti en hún seldi á síðasta ári hlut sinn í Vinnslustöðinni í Vestmannaeyjum og mun kaupandinn hafa verið Brim. Í tíunda sæti er síðan Valur Ragnarsson, Reykjavík. Valur sem forstjóri Medis, sem einnig stýrir sameiginlegri starfsemi Actavis á Íslandi, greiddi 135,4 milljónir króna í opinber gjöld á síðasta ári. Valur er jafnframt sá eini þeirra tíu sem hæst gjöld greiddu á síðasta ári sem einnig var í þeirri stöðu árið 2015 en þá var Valur í sjöunda sæti.

Hér að neðan er birtur listi yfir þá einstaklinga sem eru í ellefta til tuttugasta sæti á listanum yfir þá sem hæst opinber gjöld greiddu á síðasta ári en þar má meðal annars finna mæðginin Kristínu Fenger og Ara Fenger, erfingja Nathan og Olsen heildverslunar, Róbert Wessman fjárfesti og og Ársæl Hafsteinsson, framkvæmdastjóra gamla Landsbankans.

Aldrei fleiri framteljendur

Framteljendur hafa aldrei verið fleiri en á síðasta ári en samkvæmt upplýsingum frá Ríkisskattstjóra voru framteljendur 286.728 talsins, ríflega níu þúsundum fleiri en árið áður. Skattur var áætlaður á ríflega 13.000 einstaklinga sem jafngildir um 4,6 prósentum af heildarfjölda framteljenda. Ástæður þess eru eitthvað misjafnar, í einhverjum tilvikum hafa einstaklingar einfaldlega ekki skilað skattframtali. Nálega öllum skattframtölum var skilað á rafrænu formi, eða 99,6 prósentum.

Inneignir þeirra framteljenda sem eiga inni hjá ríkissjóði eftir álagningu opinberra gjalda verða lagðar inn á bankareikninga þeirra í dag. Kærufrestur vegna álagningar rennur út 31. ágúst næstkomandi.

  1. Brynjólfur Gunnar Halldórsson, Seltjarnarnesi, 127.831.300 kr.
  2. Ársæll Hafsteinsson, Flóahreppi, 126.891.787 kr.
  3. Kristinn Már Gunnarsson, Reykjavík, 120.233.253 kr.
  4. Jón Sigurðsson, Garðabæ, 116.740.909 kr.
  5. Ari Fenger, Garðabæ, 115.030.402 kr.
  6. Benedikt Rúnar Steingrímsson, Dalabyggð, 112.971.635 kr.
  7. Magnús Jóhannsson, Hafnarfirði, 110.108.149 kr.
  8. Vilhelm Róbert Wessman, Reykjavík, 107.513.728 kr.
  9. Kristín Fenger Vermundsdóttir, Reykjavík, 107.373.232 kr.
  10. Árni Pétur Jónsson, Reykjavík, 99.246.014 kr.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.